Skynsamleg nýting náttúruauðlindanna er mikilvægur þáttur í endurreisn íslensks efnahagslífs. Fiskimiðin og orkulindirnar eru endurnýjanlegar og sjálfbærar og þess vegna skiptir máli að þær séu nýttar til fulls sem fyrst til að efla útflutning og tryggja landsmönnum góða afkomu.
Nauðsynlegt er að afrakstur sjávarauðlindarinnar verði hámarkaður með því að byggja upp fiskistofna á grundvelli hagkvæmrar veiðisóknar, sem styðst við álit vísindamanna eins og gert hefur verið á undanförnum árum.
Íslendingar hafa öðrum þjóðum betri aðgang að hreinu drykkjarvatni, sem hér finnst í miklu magni og getur í framtíðinni orðið að drjúgum útflutningsverðmætum. Þess vegna er þýðingarmikið að þrengja ekki um of að vatnsverndarsvæðum.
Orkulindir landsins hafa í vaxandi mæli verið hagnýttar á undanförnum áratugum til rafmagnsframleiðslu og húshitunar. Rafmagns- og húshitunarkostnaður hér á landi er umstalsvert lægri en í nágrannalöndunum, þrátt fyrir að byggð sé dreifð. Með nýtingu innlendra orkugjafa hafa lífskjör batnað umtalsvert um leið og dregið hefur veið úr losun kolefnis út í andrúmsloftið.
Í lok þessa árs er von á niðurstöðu verkefnahóps um rammaáætlun, þar sem sett verður fram tillaga um nýtingu orkulindanna og jafnframt tekin afstaða til þess hvaða svæði skuli varðveita með tilliti til náttúruverndar. Með því að horfa samtímis til nýtingar- og verndarsjónarmiða má gera ráð fyrir að niðurstaðan geti orðið grundvöllur sátta um það hvaða svæði megi nýta og hver eigi að vernda.
Hlutfall endurnýjanlegra orkugjafa í orkunotkun er hvergi hærra en á Íslandi. Æskilegt er að Íslendingum verði áfram gert kleift að nýta orkulindirnar til orkufrekrar framleiðslu með sams konar ákvæði við Kyotobókun loftslagssamnings Sameinuðu þjóðanna og nú er í gildi. Slíkt ákvæði er í samræmi við markmið loftslagssamningsins og hluti af lausninni á sviði loftslagsmála.
Íslendingar eiga að leggja áherslu á að vera til fyrirmyndar í umhverfismálum. Það verður best gert með því að þeir, sem menga, greiði kostnaðinn og hagrænir hvatar verði notaðir til að ýta undir endurvinnslu. Jafnframt þarf að tryggja að gætt sé að umhverfissjónarmiðum í allri starfsemi samfélagsins. Stjórnvöld eiga að kappkosta að í gildi séu skýrar reglur um umhverfisvernd, sem móti samvinnu fyrirtækja og opinberra aðila sem fylgjast með að farið sé að settum reglum. Mikilvægt er að stjórnvöld virði sjálf eigin reglur um fresti, en dragi ekki ákvarðanir von úr viti eins og tíðkast hefur.
Á næstu árum má gera ráð fyrir að ný tækni í orkunotkun bifreiða opni leið fyrir Íslendinga til að nýta innlenda, endurnýjanlega orku í stað innflutts eldsneytis. Það færir þjóðinni ný tækifæri í auðlindanýtingu og umhverfismálum. Jafnframt er ljós að aukin áhersla á landgræðslu og skógrækt vinnur gegn kolefnislosun um leið og slík uppgræðsla kemur í veg fyrir jarðvegseyðingu og fok, sem er stærsta umhverfisvandamál hér á landi.
Skynsamleg auðlindanýting og öflug umhverfisvernd geta auðveldlega farið saman, skapað skilyrði fyrir bætt lífskjör og lagt lóð á lóðarskálina við endurreisn íslensks efnahagslífs, sem byggir á sjálfbærum grunni.