Atvinnulausir
Atvinnulausir eru nú yfir 14 þúsund á landinu öllu. Flestir atvinnulausra búa á höfuðborgarsvæðinu eða um níu þúsund og næstflestir á Suðurnesjum eða um sextán hundruð. Margir eru atvinnulausir á Norðurlandi eystra en fæstir á Vestfjörðum eða innan við eitt hundrað manns.
Atvinnuleysi er í flestöllum geirum atvinnulífsins, misjafnt er þó eftir atvinnugreinum hve atvinnuleysið er mikið. Atvinnulausir hafa fjölbreytta og ólíka menntun svo og bakgrunn.
Þarna er stór auðlind sem þarf að virkja sem allra fyrst, ekki má þjóðin við því að missa mikið að hæfu og vel menntuðu fólki úr landinu.
Uppbygging - lausn - aðgerðir
Þjóðin stendur nú á erfiðum þáttaskilum og risavaxin og erfið verkefni framundan. Þess vegna gefst núna svigrúm fyrir tækifæri og fyrir hugarfarsbreytingu og einmitt þá er pláss (andrúm) fyrir nýja hugsun og sköpun. Vegna óvissuástandsins í atvinnumálum hérlendis verður því að leggja áherslu á að komast í gang með einhvers konar nýtt konsept. Ekki er nóg að vera endalaust að tala um viðskiptahugmyndir ef ekkert stendur á bak við það tal, það verður að koma alveg nýrri hugsun í gang til að fjölga atvinnutækifærum hér á landi fyrir framtíðina, með bjartsýni og áhuga og markmið um árangur og uppbyggingu að leiðarljósi.
Ný konsept - ný sköpun
Á þrengingartímum sem þessum leiðist úr læðingi hröð þróun á nýrri tækni ólíkt því sem gerist á allsnægtartímun en þá verður þróun á þessum sviðum meira hægfara. Þarna sannast hin mætu orð um að neyðin kenni naktri konu að spinna.
Áherslan þarf m.a. að vera á það að þróa konsept sem nær til þeirra auðlinda sem til staðar eru í landinu með nýrri tækni.
Hugmynd að nýrri tækni - Útflutningur á rafmagni
Hugmynd mín er að leiða saman teymi.
Annars vegar:
háskólanema, tækninema, iðnskólanema, prófessora og kennara í verkfræði, tölvunarfræði, tæknifræði, rafmagnsfræði o.fl. greina (einu nafni fræðimenn).
Hins vegar:
iðnaðarmenn, rannsóknarfyrirtæki á tækni- og verkfræðisviði o.fl. (fulltrúa atvinnulífsins). Búa til "Spin-off" áhrif.
Með því að koma saman fræðimönnum og iðnaðarmönnum og skaffa þeim rannsóknar-aðstöðu er hægt að þróa nýja tækni til þess að finna út hvernig við getum flutt út rafmagn. Allir njóta góðs af samvinnunni, iðnaðarmenn, rannsóknaraðilar, stjórnmálamenn o.fl.
Svona teymisvinna er notuð víða erlendis til þess að þróa upp nýja tækni.
Á Lollandi í Danmörku hefur þetta verið gert í sambandi við vetni, þörungaframleiðslu og rafmagnsframleiðslu frá vindmyllum. Í litlum bæ á Lollandi sem heitir Vestenskov er verið að koma á vetnisþorpi með nýtingu vindorkunnar frá vindmyllum í nágrenninu. Nýting vindorkunnar í þorpið að nóttu til að framleiða vetni sem síðan er hægt að nota á daginn til raforkuframleiðslu. Hvert hús er með rafhlöðu og áætlað er að öll húsin í þorpinu verði tengd árið 2009 og við það sparast 1 tonn af CO2 / íbúa. Vetnið er eins konar rafhlaða fyrir vindorkuna og síðan eru settar stöðvar í hús þar sem vetni er aftur breytt í rafmagn. Vandamálið er að geyma vetnið.
"Triple Helix" er eitt þeirra verkefna sem sett var þar í gang þar en það er samvinna á milli háskóla og einkafyrirtækja. Svona teymisvinna skapar bæði nýja og betri tækni og mörg atvinnutækifæri á ótrúlega skömmum tíma.
Útflutningur á rafmagni
Vissulega erum við að flytja út rafmagn í formi áls og svo er einnig talað um orkufrekan tölvuiðnað sem geymir gögn víðs vegar úr heiminum. Það stendur alveg á sínu.
Hægt er að hlaða stóra rafgeyma með rafmagni og flytja út. Vandamálið við þá er að rafgeymarnir eru fyrirferðamiklir og erfitt að eyða þeim og að þeir eru mjög mengandi fyrir umhverfið. Ég er ekki að tala um rafstrengi á milli landa, veit að eftir því sem þeir eru lengri þá tapast rafmagn af þeim og eru þeir þvi ekki hagkvæm lausn á þessu.
Ég er að tala um eitthvað allt annað, fyrirferðalítið tæki sem hefur geymslu á ótrúlegri samþjöppun rafmagns og er ódýr lausn og ódýrt að flytja á milli landa og er ekki mengandi. Ég er að tala um að selja rafmagn út til annarra landa sem hægt er að nota t.d. til upphitunar húsa. Víða erlendis er orka til upphitunar húsa mjög dýr t.d. í Danmörku sem hefur engin fallvötn eða háhitasvæði til að virkja. Þess vegna eru þeir að lenda í erfiðum málum með húsin sín en margar vistarverur eru með töluvert mengandi inniloft sökum raka og myglusvepps sem hefur síðan vond áhrif á öndunarfæri manna, svo dæmi séu tekin.
Trúin flytur fjöll
Ég hef mikla trú á þessu verkefni og er viss um að þetta er hægt.
Olía sem orkugjafi verður hallærisleg eftir nokkur ár vegna mengunar sem hún skilur eftir sig í andrúmsloftinu og olíuvænting á Drekasvæðinu kostar of mikið vesen og peninga sem verður sennilega til þess að fallið verður frá þeim framkvæmdum ef þar er þá einhverja olíu að finna.
"Best solution can be enemy with good solution", það á ekki alltaf að bíða eftir að besta tæknin verði fundin upp - það verður alltaf þróun í tækninni. Þess vegna eigum við að nota þá tækni í dag sem er góð og grípa gæsina núna og síðan er hægt að þróa tæknina áfram.