Endurreisnarnefnd Sjálfstæðisflokksins mun kynna vinnu sína í ítarlegri skýrslu, sem skiptist í nokkra hluta. Í þessum kafla skýrslunnar er fjallað um atvinnulífið í samfélaginu, þ.e. samband fjölskyldna og heimila við atvinnulífið. M.a. er fjallað um atvinnuleysi, fjárhagserfiðleika, hag heimilanna og atvinnulífsins og hagsýnan heimilsbúskap. Leitast er við að skilja mikilvægi atvinnulífs og fjölskyldulífs hvors fyrir annað og hvernig hagsmunir heimilanna og atvinnulífsins eru samofnir. Hér verða birt drög að texta í skýrsluna og notendum vefsins gefst kostur á að segja sína skoðun á.
Atvinnulausir eru nú yfir 14 þúsund á landinu öllu. Flestir atvinnulausra búa á höfuðborgarsvæðinu eða um níu þúsund og næst flestir á Suðurnesjum eða um sextán hundruð. Margir eru atvinnulausir á Norðurlandi eystra en fæstir á Vestfjörðum eða innan við eitt hundrað manns. Atvinnuleysi er í flestöllum greinum atvinnulífsins, misjafnt er þó eftir atvinnugreinum hve atvinnuleysið er mikið. Atvinnulausir hafa fjölbreytta og ólíka menntun svo og bakgrunn.
Þarna er stór auðlind sem þarf að virkja sem allra fyrst, ekki má þjóðin við því að missa mikið að hæfu og vel menntuðu fólki úr landinu.